आकाशवाणी नागपूरवर आज विठ्ठल भक्तिरसाची मेजवानी

आकाशवाणी नागपूरवर आज विठ्ठल भक्तिरसाची मेजवानी 

दशरथ पाटील यांच्या सुरांना तबला विशारद छगन बावनकुळे यांची सुरेल साथ

लोकसंगीत कार्यक्रमातून विठ्ठल भजनांनी श्रोते होणार मंत्रमुग्ध

कन्हान : - विठ्ठल भक्तिरसाने ओतप्रोत भरलेला लोकसंगीताचा सुरेल आविष्कार आज (दि.२०) नागपूर आकाशवाणीच्या माध्यमातून रसिकांच्या भेटीला येणार आहे. सुप्रसिद्ध भजन गायक दशरथ पाटील यांच्या ओजस्वी आणि भावस्पर्शी गायनाला तबला विशारद बालकलाकार छगन राजेंद्र बावनकुळे यांच्या लयबद्ध तबलावादनाची सुरेख साथ लाभणार असून, हा कार्यक्रम संगीतप्रेमींसाठी पर्वणी ठरणार आहे.

नागपूर आकाशवाणीच्या 'लोकसंगीत' या विशेष कार्यक्रमांतर्गत विठ्ठल भजनांचे सादरीकरण दुपारी १.४५ वाजता प्रसारित होणार आहे. भक्तिरस, सुरांची माधुरी आणि तबल्याच्या नादमय ठेक्यांनी सजलेला हा कार्यक्रम श्रोत्यांना विठ्ठल भक्तीच्या रंगात रंगविणार आहे.

भजन गायनातील भावपूर्ण अभिव्यक्ती आणि तबल्यावरील प्रभुत्व यांचा अनोखा संगम या कार्यक्रमातून अनुभवायला मिळणार आहे. दशरथ पाटील यांच्या सुमधुर आवाजाला तबला विशारद छगन बावनकुळे यांची प्रभावी साथ लाभल्याने विठ्ठल नामस्मरणाचा आनंद द्विगुणित होणार आहे. त्यांच्या तबल्याच्या नादमय ठेक्यांमुळे प्रत्येक भजनाला एक वेगळी उंची प्राप्त होणार असून, श्रोते संगीताच्या भक्तिमय विश्वात हरवून जाणार आहेत.

या कार्यक्रमात निर्मला पाटील, भोजराम किरपानकर, संगीता किरपानकर आणि चंदाताई बालपांडे यांचेही सहकार्य लाभले आहे. लोकसंगीत परंपरेचा वारसा जपत सादर होणारा हा कार्यक्रम संगीत आणि भक्ती यांचा अविस्मरणीय संगम ठरणार असल्याची भावना रसिकांकडून व्यक्त होत आहे.

विठ्ठल भक्ती, सुरेल गायन आणि तबल्याच्या मंत्रमुग्ध करणाऱ्या नादाची अनुभूती घेण्यासाठी संगीतप्रेमींनी आज दुपारी १.४५ वाजता नागपूर आकाशवाणीवरील हा विशेष कार्यक्रम आवर्जून ऐकावा, असे आवाहन आयोजकांनी केले आहे.

सह संपादक - ऋषभ बावनकर