नांदेड एसीबीचा ढिसाळ कारभार; लाचखोर विस्तार अधिकाऱ्यावर गुन्हा दाखल होऊनही अटक का नाही?
तक्रारदाराचा थेट आरोप: लाचलुचपत विभागाच्या सुस्तपणामुळेच भ्रष्टाचाऱ्यांना बळ!
मुखेड (विशेष प्रतिनिधी):
डॉ. बाबासाहेब आंबेडकर स्वावलंबन योजनेअंतर्गत मंजूर झालेल्या विहिरीच्या दुसऱ्या हप्त्याचे बिल काढण्यासाठी तब्बल २५ हजारांची लाच मागणाऱ्या मुखेड पंचायत समितीच्या विस्तार अधिकाऱ्यावर गुन्हा दाखल होऊन महिना उलटत आला, तरी त्याला अद्याप अटक करण्यात आलेली नाही. लाचलुचपत प्रतिबंधक विभाग (ACB), नांदेड यांच्या या अत्यंत ढिसाळ आणि संशयास्पद कारभारामुळेच नांदेड जिल्ह्यात लाचखोरी आणि भ्रष्टाचाराचे प्रमाण कमालीचे वाढत चालले आहे, असा खळबळजनक आरोप तक्रारदार प्रशांत रमेश पवित्रे यांनी केला आहे.
नेमके प्रकरण काय?
मिळालेल्या माहितीनुसार, तक्रारदार प्रशांत रमेश पवित्रे यांचे भाऊ रावसाहेब रमेश पवित्रे यांच्या शेतीमध्ये 'डॉ. बाबासाहेब आंबेडकर स्वावलंबन योजने'अंतर्गत शासकीय विहीर मंजूर झाली होती. या विहिरीचे काम प्रगतीपथावर असताना, दुसऱ्या हप्त्याचे बिल मंजूर करून देण्यासाठी मुखेड पंचायत समितीचे विस्तार अधिकारी चंपत शिंदे यांनी पवित्रे यांच्याकडे २५,००० रुपयांच्या लाचेची मागणी केली होती.
लाच देण्याची अजिबात इच्छा नसल्याने, प्रशांत पवित्रे यांनी २६ फेब्रुवारी २०२६ रोजी लाचलुचपत प्रतिबंधक विभाग, नांदेड यांच्याकडे रीतसर तक्रार नोंदवली होती.
गुन्हा दाखल, पण आरोपी मोकाट!
तक्रारीच्या अनुषंगाने एसीबी नांदेडने पडताळणी करून कारवाई केली. त्यानंतर मुखेड पोलीस ठाण्यात दिनांक २२ मे २०२६ रोजी लाचखोर विस्तार अधिकारी चंपत शिंदे याच्याविरुद्ध 'भ्रष्टाचार प्रतिबंधक अधिनियम १९८८' च्या कलम ७ आणि ७ (अ) नुसार गुन्हा दाखल करण्यात आला.
परंतु, गुन्हा दाखल होऊन अनेक दिवस उलटले तरी लाचलुचपत विभागाच्या अधिकाऱ्यांनी आरोपी चंपत शिंदे याला अद्यापही अटक केलेली नाही.
"भ्रष्टाचाऱ्यांवर वचक ठेवण्याची जबाबदारी असलेल्या यंत्रणेनेच जर अशी सुस्त भूमिका घेतली, तर सामान्य जनतेने न्याय कोणाकडे मागायचा? एसीबीच्या याच ढिसाळ कारभारामुळे जिल्ह्यात लाचखोरांचे धाबे दणाणण्याऐवजी त्यांचे धाडस अधिक वाढत चालले आहे."
— प्रशांत पवित्रे (तक्रारदार)
जनतेमध्ये तीव्र संताप
शासकीय योजनांचा लाभ घेण्यासाठी गरिबांना आणि शेतकऱ्यांना लाच द्यावी लागते, ही अत्यंत लाजिरवाणी बाब आहे. त्यातही तक्रारदाराने हिंमत दाखवून तक्रार केल्यानंतरही यंत्रणा आरोपीला अटक करण्यात दिरंगाई करत असल्याने, "एसीबी नक्की कोणाला पाठीशी घालत आहे?" असा संतप्त सवाल आता नांदेड जिल्ह्यातील नागरिकांमधून उपस्थित केला जात आहे. या प्रकरणातील लाचखोर अधिकाऱ्याला तात्काळ बेड्या ठोकण्यात याव्यात, अशी मागणी जोर धरत आहे.
0 टिप्पण्या