जुनिकामठी येथे हरिणाच्या पाडसाला जीवदान
जीवन रक्षक दलाच्या चमुने कुत्र्यांच्या तावडीतुन पाडसाची सुटका ; वन विभागाच्या ताब्यात दिले.
कन्हान : - पारशिवनी तालुक्यातील जुनिकामठी परिसरात हरिणाच्या पाडसाचे प्राण वाचविण्याची उल्लेखनीय घटना घडली. भटकी कुत्री हरिणाच्या पाडसा च्या मागे लागल्याचे लक्षात येताच जीवन रक्षक दलाच्या सदस्यांनी तातडीने धाव घेत कुत्र्यांना हुसकावुन लावले आणि पाडसाची सुरक्षित सुटका केली. त्यानंतर माजी उपसरपंच तथा ग्राम पंचायत सदस्य भुषण इंगोले यांच्या पुढाकाराने वन विभागाशी संपर्क साधुन पाळस वन विभा गाच्या ताब्यात सुपूर्द करण्यात आले.
प्राप्त माहितीनुसार, शुक्रवारी (दि. २४) जुलै रोजी दुपारच्या सुमारास जुनिकामठी गावाबाहेरील शेत शिवारात हरिणाचे लहान पाडस भटकले होते. त्याचवेळी काही भटकी कुत्री त्याच्या मागे लागल्याचे पाहुन जीवन रक्षक दलाचे सदस्य आणि शेतातील नागरिकांनी तात्काळ मदत कार्य सुरू करून कुत्र्यांना दूर हाकलुन पाळस सुरक्षित ताब्यात घेण्यात आले. घटनेची माहिती मिळताच माजी उपसरपंच व ग्रा.प.सदस्य भुषण इंगोले यांनी वन विभाग, नागपुर यांच्याशी संपर्क साधला. सायंकाळी वन विभागाचे रेस्क्यु पथकाचे प्रतिक घाटे व भुरे हे घटनास्थळी पोहोचले आणि आवश्यक तपासणी नंतर हरिणाचे पाडस त्यांनी ताब्यात घेतले. या बचाव मोहिमेत भुषण इंगोले, रोशन धुर्वे, निलेश सलामे, हर्षल वाघधरे, विक्की ठाकरे, अजय उईके, राज इरपाते, महेंद्र ढोके आदी जीवन रक्षक दलाच्या सदस्यांनी मोलाची भूमिका बजावली. त्यांच्या तत्परतेमुळे हरिणाच्या पाडसाचे प्राण वाचल्याने परिसरात त्यांच्या कार्याचे सर्वत्र कौतुक होत आहे.
सह संपादक - ऋषभ बावनकर
0 टिप्पण्या